परवा मी झाडाला
मारला एक दगड
बाबा म्हणाले आईला,
‘ह्याला खूप बदड.'
झाडाला असं कधी
दगड कोणी मारतं का?
झाडाला लागलं, तरी
झाडं कधी बोलतं का?
दगड न मारतासुद्धा
झाड खूप काही देतं
उन्हामध्ये सावली आणि
फळेसुद्धा देतं !
झाडांशिवाय आपल्याला
ऑक्सिजन कोण देणार?
झाडांवरच्या चिमण्या
सांगा कोठे बरं राहणार?
झाडांची काळजी बाळा
आपण सारे घेऊ
रोज सकाळी झाडांना
थोडं पाणीसुद्धा देऊ !
आता कळलं बाळा,
झाड किती शहाणं असतं
आपल्या सर्वांसाठी ते
दिवस-रात्र उभं असतं....!
- सुजित कदम, पालक
सौ. विमलाबाई गरवारे प्रशाला, पुणे